مش معقول
 دم الشهدا ما جفّش
 جرح الضحايا ما خفّش
 و صوت مظلوم فى جوف السجن
 راح يصرخ بصوت معلول 
مش معقول 



نعيد فينا و بإيدينا نظام مشلول
 نروح تانى برجلينا لحضن الغول
 نسلمهم أمانينا 
و حلم صابح فى وادينا
 و صوت مستوحى من زمان العزة ماضينا
و نقول دى عقول 

عقول فى الخراب تسعى
 إيديهم الدم لوثها 
و لعبة التلات ورقات 
أستاذهم هو مهندسها 

تلامذة فرعون بكل اخلاص 
رجعوا يوسوسوا فى عقول الناس 
رجعوا لاجل يعيدوا تانى زمنه 
أفكركم
 أنـا اللى كنت فى الميدان شايل على ايده كفنه 

أنــا الشهيد
 أنــا الوعيد
 أنــا المصاب 
أنــا اللى عشت عمرى سنين م الغصة و الاكتئاب
 أنــا اللى شوفت بلادى بتأن تحت رجلين الكلاب 
أنــا العذاب اللى هيفضل يطاردهم
 أنــا طابور العيش اللى هيفضل يجاهدهم 
أنــا المستشفى المريضة
 أنــا القريــــــة البعيـــــدة
 أنــا الكلمة الشريدة اللى هتفضل تسائلهم

 عن الغرقى فى مراكب صيد
 عن الحرقى جوه قطر العيد 
عن سينا الجريحة و عن الصعيد
 عن الأرض اللى بتبور يوماتى

 عن الدم المسرطن فى وريد إخواتى

 أنــا اللى باع دمه لاجل اشترى الآتى

اشترى لوطنى بكرة صابح

 اشترى لوطنى نخل طارح

 مش بقايا فلول

و مرار فى الحلق طافح

مش معقــــــــــــــول !!

 _____________________________أدهم صلاح الدين ، 
الريــاض
 14/ 5 / 2012